花壽根，七日鮮也，極為罕。魚阿占遞來一尾，巴掌大小，四五兩到，扁平，肚白。新鮮游水海魚，只放蔥蒸。鮮甜爽滑，好吃至極，這魚只偶被捕獲，碰上得買來食。也要兩尾牛鯭，撕掉魚皮下蔥蒸可以。同日缸裡留有一條三斤多的，阿占話另有客閒訂回家當刺身用，真有人藝高膽大。

今夜魚餸，有黑鱲、金鼓、油錐各一。魚身全大不過六兩，肯定能吃完。游水海魚，全蒸用，黑鱲下蔥薑，金鼓以陳皮，油錐撈汁。汁是簡單的蒜頭豆豉辣椒砂糖鮑汁，生抽生油生粉撈埋，裹著魚件，像蒸白鱔。僅蒸而已，焉為容易？三魚齊蒸，莫容有一尾過火或涼掉，烹小鮮若治大國，人好挑戰一下自己。先調定魚汁和計時器，八分鐘內完成，油錐黑鱲先蒸落，一分鐘後蒸金鼓，四分鐘始燒熱蔥油，七分鐘黑鱲取出棄薑舖蔥淋汁，最後八分金鼓油錐皆熟，蔥油灒上。禮成，趁熱食，味美無窮。

前時赤米蝦當造，試圖配平日炒肉絲的茭白。茭白切絲，像油燜做法般先炒熟，再放入赤米蝦灑紹酒蓋焗一分鐘後調味㨮勻，鮮甜味香，效果不俗。季節當造的還有禮雲子，中環大班樓食過，沒得買。

撈一味涼菜，用麻醬麻油鎮江醋蜜糖鹽加老抽調色水，攪勻成汁。寧夏小旺菜清洗揈乾，然後一瓣瓣擘開，生撈進汁。有點像日本果醋撈西生菜，菜遇醋鹽後縮小，愈撈愈多。灑些烘熱的芝麻，酸甜且香。國內稱之乾隆白菜，叫得真封建，改名十全白菜更好好。